कञ्चनपुर /कञ्चनपुर को शुक्लाफाँटा नगरपालिका–८ स्थित भित्री सडकमा दुई मोटरसाइकल आपसमा ठोक्किँदा एक जनाको मृत्यु भएको छ भने दुई जना घाइते भएका छन्।
प्रहरीका अनुसार म २ प ५०५५ नम्बरको मोटरसाइकल र से ६ प ५९१३ नम्बरको मोटरसाइकल एकआपसमा ठोक्किएर दुर्घटना भएको हो। दुर्घटनामा से ६ प ५९१३ नम्बरको मोटरसाइकल चालक ४५ वर्षीय मिनबहादुर जागरी गम्भीर घाइते भएका थिए।
उपचारका लागि उनलाई सेती प्रादेशिक अस्पताल लगिएको थियो। उपचारकै क्रममा बुधबार बेलुकी उनको मृत्यु भएको प्रहरीले जनाएको छ।
दुर्घटनामा सोही मोटरसाइकलमा पछाडि सवार ५५ वर्षीय मंगल महरा र अर्को मोटरसाइकल चालक ४२ वर्षीय कम्मानसिंह ठगुन्ना घाइते भएका छन्। उनीहरूको माया मेट्रो अस्पताल मा उपचार भइरहेको छ।
घटनाबारे थप अनुसन्धान भइरहेको प्रहरीले जनाएको छ।
